چل پڑے تو پھر اپنی دھن میں بے خبر برسوں

چل پڑے تو پھر اپنی دھن میں بے خبر برسوں

لوٹ کر نہیں دیکھا ہم نے اپنا گھر برسوں

جادۂ حوادث میں چل کے دیکھ لے کوئی

کیسے طے کیا ہم نے موت کا سفر برسوں

برگ و بار پر اس کے حق نہیں ہمارا ہی

اپنے خون سے سینچا ہم نے جو شجر برسوں

جو صدف سمندر کی تہہ میں چھان سکتے تھے

ڈھونڈتے رہے وہ بھی ریت میں گہر برسوں

دوستو ضرورت پر کام آ گیا اپنے

دشمنوں سے سیکھا تھا ہم نے جو ہنر برسوں

جب ملے رفیقوں سے زخم ہی ملے ہم کو

بے سبب رہا دل میں دشمنوں کا ڈر برسوں

وہ بھی کیا عجب دن تھے شوق رہ نوردی میں

ہم نے بھی زمانے کی سیر کی ظفرؔ برسوں

chal pare to phir apni dhun mein be khabar barson

laut kar nahin dekha ham ne apna ghar barson

jada-e-hawadis mein chal ke dekh le koi

kaise tai kiya ham ne maut ka safar barson

barg-o-bar par us ke haq nahin hamara hi

apne khun se sincha ham ne jo shajar barson

jo sadaf samundar ki tah mein chhan sakte the

dhundte rahe wo bhi ret mein guhar barson

dosto zarurat par kam a gaya apne

dushmanon se sikha tha ham ne jo hunar barson

jab mile rafiqon se zakhm hi mile ham ko

be sabab raha dil mein dushmanon ka dar barson

wo bhi kya ajab din the shauq-e-rah nawardi mein

ham ne bhi zamane ki sair ki zafar barson