خدا کی راہ میں قربان کی ہے زندگی میں نے

خدا کی راہ میں قربان کی ہے زندگی میں نے

یہ وہ غم ہے کہ اس غم پر لٹائی ہر خوشی میں نے

ہواؤں میں جلایا ہے چراغ زندگی میں نے

چراغ زندگی کو دل سے دی ہے روشنی میں نے

ابھی کھنچنے نہ پائی تھی کہ صہبا تاک لی میں نے

کوئی پینے نہ پایا تھا کہ پی اور خوب پی میں نے

وہی تشبیہ دی تو نے وہی تشبیہ دی میں نے

رہے گا ذات میں کیا جب صفت ہی چھین لی میں نے

سمجھتا ہوں تجھے دیکھا تجھے پوجا خبر کیا تھی

ترے آئینے میں اپنی ہی صورت دیکھ لی میں نے

مرے مسلک میں خود کو بھولنا حق کو بھلانا ہے

خدا دانی کو پایا معنی خود آگہی میں نے

مرے پیش نظر آئینہ خانے کی حقیقت ہے

ہزاروں اور لاکھوں میں بھی دیکھا ایک ہی میں نے

یہ عکس و آئینہ ذی صورت و صورت کی وحدت بھی

سمجھنے اور سمجھانے کی باتیں جو ہیں کی میں نے

حریم کبریا میں باریابی ان کو کیا ہوگی

حریم دل میں دیکھی ہے دلوں کی نارسی میں نے

khuda ki rah mein qurban ki hai zindagi main ne

ye wo gham hai ke is gham par lutai har khushi main ne

hawaon mein jalaya hai charagh-e-zindagi main ne

charagh-e-zindagi ko dil se di hai raushni main ne

abhi khinchne na pai thi ke sahba tak li main ne

koi pine na paya tha ke pi aur khub pi main ne

wahi tashbih di tu ne wahi tashbih di main ne

rahega zat mein kya jab sifat hi chhin li main ne

samajhta hun tujhe dekha tujhe puja khabar kya thi

tire aine main apni hi surat dekh li main ne

mire maslak mein khud ko bhulna haq ko bhulana hai

khuda dani ko paya maani-e-khud agahi main ne

mire pesh-e-nazar aina khane ki haqiqat hai

hazaron aur lakhon mein bhi dekha ek hi main ne

ye aks-o-aina zi surat-o-surat ki wahdat bhi

samajhne aur samjhane ki baten jo hain ki main ne

harim-e-kibriya mein baryabi un ko kya hogi

harim-e-dil mein dekhi hai dilon ki narasi main ne