کیا نہ دیکھا یہ کہو یہ نہ کہو کیا دیکھا

کیا نہ دیکھا یہ کہو یہ نہ کہو کیا دیکھا

ہم نے جو کچھ بھی کسی بزم میں دیکھا دیکھا

دیکھنے کو سر محفل رخ زیبا دیکھا

ہم کو جو کچھ تری آنکھوں نے دکھایا دیکھا

وہ بہاریں کہ ترے ساتھ مجھے دیکھ گئیں

کیا کہیں گی اگر آ کر مجھے تنہا دیکھا

حسن خود بیں کو ہے کیا عشق خدا بیں سے گریز

میری آنکھوں سے بھی اپنا رخ زیبا دیکھا

سب سے مل کر بھی کم آمیز ہے تمکین جمال

تجھ کو دیکھا تو بھری بزم میں تنہا دیکھا

نکتہ چیں دیدۂ ظاہر ہے مری آنکھوں پر

ہم نے آئینہ نہ دیکھا رخ زیبا دیکھا

چاندنی چاند سی صورت کی گھنی زلف کی چھاؤں

پھر اندھیرا نظر آیا نہ اجالا دیکھا

اس کو اپنا کوئی سمجھا ہے نہ سمجھے گا ذہینؔ

جس کو بیگانگیٔ ہوش میں اپنا دیکھا

kya na dekha ye kaho ye na kaho kya dekha

ham ne jo kuchh bhi kisi bazm mein dekha dekha

dekhne ko sar-e-mahfil rukh-e-zeba dekha

ham ko jo kuchh tiri ankhon ne dikhaya dekha

wo baharen ke tire sath mujhe dekh gain

kya kahengi agar a kar mujhe tanha dekha

husn-e-khud bin ko hai kya ishq khuda bin se gurez

meri ankhon se bhi apna rukh-e-zeba dekha

sab se mil kar bhi kam amez hai tamkin-e-jamal

tujh ko dekha to bhari bazm mein tanha dekha

nukta chin dida-e-zahir hai miri ankhon par

ham ne aina na dekha rukh-e-zeba dekha

chandni chand si surat ki ghani zulf ki chhaon

phir andhera nazar aya na ujala dekha

us ko apna koi samjha hai na samjhega zahin

jis ko beganagi-e-hosh mein apna dekha