نہ الفاظ پہنچیں نہ معنی وہاں تک

نہ الفاظ پہنچیں نہ معنی وہاں تک

کہوں حسن کی حد کہاں سے کہاں تک

بہت دور ہیں اصلیت سے فسانے

بڑا فاصلہ ہے دلوں سے زباں تک

گزر جا محبت میں بیم و رجا سے

محبت میں خامی ہے سود و زیاں تک

اسی سے امید نوازش ہے دل کو

ہنسی میں اڑا لے گیا جو فغاں تک

دعا لب پہ آتی ہے دل سے نکل کر

زمیں سے پہنچتی ہے بات آسماں تک

ذہینؔ آج آفاق بن کر عیاں ہے

جو اک حرف آیا تھا میری زباں تک

na alfaz pahunchen na maani wahan tak

kahun husn ki had kahan se kahan tak

bahut dur hain aslet se fasane

bara fasla hai dilon se zaban tak

guzar ja mohabbat mein bim-o-raja se

mohabbat mein khami hai sud-o-ziyan tak

usi se ummid-e-nawazish hai dil ko

hansi mein ura le gaya jo fughan tak

dua lab pe ati hai dil se nikal kar

zamin se pahunchti hai bat asman tak

zahin aj afaq ban kar ayan hai

jo ik harf aya tha meri zaban tak