دل کی دنیا میں تری یاد کے منظر جاگے

دل کی دنیا میں تری یاد کے منظر جاگے

آنکھ سے اشک گرے غم کے سمندر جاگے

قافلہ لٹنے کا افسوس نہیں دکھ یہ ہے

راہزن جا چکے جس وقت تو رہبر جاگے

دل کی ظلمت کو مٹایا ہی نہیں جا سکتا

جب تلک شہر تمنا میں نہ محشر جاگے

ہم سے دیوانوں نے سر پیش کیے ہیں ہنس کے

جب بھی مقتل میں کبھی ظلم کے خنجر جاگے

انقلاب ایک نیا برپا جہاں میں ہوگا

خواب غفلت سے کبھی جب بھی سخنور جاگے

ساری تدبیریں یہاں ہو گئیں سائرؔ بے سود

ہم گلہ کس سے کریں گر نہ مقدر جاگے

dil ki duniya mein tiri yad ke manzar jage

ankh se ashk gire gham ke samundar jage

qafila lutne ka afsos nahin dukh ye hai

rahzan ja chuke jis waqt to rahbar jage

dil ki zulmat ko mitaya hi nahin ja sakta

jab talak shahr-e-tamanna mein na mahshar jage

ham se diwanon ne sar pesh kiye hain hans ke

jab bhi maqtal mein kabhi zulm ke khanjar jage

inqilab ek naya barpa jahan mein hoga

khwab-e-ghaflat se kabhi jab bhi sukhanwar jage

sari tadbiren yahan ho gain sair be sud

ham gila kis se karen gar na muqaddar jage