وہ عشق کی مخصوص ادا کو نہیں سمجھا

وہ عشق کی مخصوص ادا کو نہیں سمجھا

نادان ابھی خوئے وفا کو نہیں سمجھا

تقدیر سے بیزار ہے تدبیر سے نالاں

افسوس ہے فرعون دعا کو نہیں سمجھا

وہ عشق کی منزل کو کبھی پا نہیں سکتا

جو شخص کہ انداز جفا کو نہیں سمجھا

کرتا نہ کبھی چاک گریبان کو مجنوں

کم فہم تھا وہ صبر و رضا کو نہیں سمجھا

کیا جانے وہ ہے کون سے اوصاف کا مالک

جو شخص کبھی جود و سخا کو نہیں سمجھا

محبوب تھا کل آج حقارت کے ہے در پے

کیا سمجھے گا جو اپنی خطا کو نہیں سمجھا

اصرار تجلی کا جو کرتا ہے مسلسل

وہ مصلحت جلوہ نما کو نہیں سمجھا

جھکتا ہے جو ظالم کے کسی ظلم کے آگے

کیوں صاف نہ کہہ دوں وہ خدا کو نہیں سمجھا

میں اس کے لئے رکھتا ہوں اخلاص و محبت

جو شخص ابھی صدق و صفا کو نہیں سمجھا

گرتا نہ کبھی ظلمت و ذلت کے گڑھے میں

صد حیف کہ وہ دار فنا کو نہیں سمجھا

اس زیست کے مقصد کو جو سمجھا نہیں سائرؔ

سچ جانئے وہ راز بقا کو نہیں سمجھا

wo ishq ki makhsus ada ko nahin samjha

nadan abhi khu-e-wafa ko nahin samjha

taqdir se bezar hai tadbir se nalan

afsos hai firaun dua ko nahin samjha

wo ishq ki manzil ko kabhi pa nahin sakta

jo shakhs ke andaz-e-jafa ko nahin samjha

karta na kabhi chak-e-gareban ko majnun

kam fahm tha wo sabr-o-raza ko nahin samjha

kya jane wo hai kaun se ausaf ka malik

jo shakhs kabhi jud-o-sakha ko nahin samjha

mahbub tha kal aj hiqarat ke hai dar pe

kya samjhega jo apni khata ko nahin samjha

israr tajalli ka jo karta hai musalsal

wo maslahat-e-jalwa numa ko nahin samjha

jhukta hai jo zalim ke kisi zulm ke age

kyun saf na kah dun wo khuda ko nahin samjha

main us ke liye rakhta hun ikhlas-o-mohabbat

jo shakhs abhi sidq-o-safa ko nahin samjha

girta na kabhi zulmat-o-zillat ke garhe mein

sad haif ke wo dar-e-fana ko nahin samjha

is zist ke maqsad ko jo samjha nahin sair

sach janiye wo raz-e-baqa ko nahin samjha