تجھے کیا خبر ہے او بے خبر مری جان تجھ پہ نثار ہے

تری شوخ و شنگ اداؤں میں مری عاشقی کا خمار ہے

تو ہی جان جاں تو ہی راز داں تو ہی میرے پیار کی کہکشاں

مرے دل کے باغ میں آج کل ترے دم سے فصل بہار ہے

میں بتا سکوں گا بھلا کہاں میں چھپا سکوں گا بھلا کہاں

مرا دل کسی پہ فدا ہوا مری جاں کسی پہ نثار ہے

نہ ہوں مضطرب نہ ہوں مطمئن ہے بڑی عجیب سی کیفیت

ہے بلند تر مری فہم سے کوئی ایسی سوچ بچار ہے

تو مرے چمن کا گلاب ہے تو مری وفا کا شباب ہے

نہ کسی کا تجھ سا خلوص ہے نہ کسی کا تجھ سا وقار ہے

تو ملا ہے مجھ کو جہاں کہیں مرے دل کے غنچے کھلے وہیں

مری خود بخود ہی جھکی جبیں تو مرا حسین نگار ہے

ترا آج سائرؔ بے نوا ہے اداسیوں میں گھرا ہوا

ترے غم میں ایسے ہے مبتلا اسے چین ہے نہ قرار ہے