جو گزرے جان سے تو پایۂ تکمیل تک پہنچے

جو گزرے جان سے تو پایۂ تکمیل تک پہنچے

نہیں ممکن کہ کوئی زیست کی تفصیل تک پہنچے

رہے ابجد کے چکر ہی میں جو تھے فکر سے عاری

ہوئے فاضل وہی جو ذوق کی تکمیل تک پہنچے

رہے برتر جہاں میں دین کے جب تک رہے شیدا

ہوئے جب دین سے غافل تو ہم تذلیل تک پہنچے

پہنچتا ہے دلائل سے تو انساں بد نتیجے پر

ذرا سی بات تھی کیوں اس کی تم تاویل تک پہنچے

تو اپنی زندگی میں خود کو پہنچا ایسی خوبی تک

زمانہ ہو ترا جویا تری تمثیل تک پہنچے

رسائی جن کی تھی سرکار شرق و غرب کے در تک

وہ شمع دین کو لے کر ہزاروں میل تک پہنچے

بہت سے نوجواں گھوم آئے لندن اور پیرس تک

کوئی مرد جری اوصاف اسماعیل تک پہنچے

زمین شعر کی آرائشوں ہی تک نہ رکھ مطلب

تخیل ہے وہی جو حلقۂ جبریل تک پہنچے

قوافی چند دام فکر تک پہنچے تھے اے سائرؔ

یہ الفاظ حسیں اشعار کی تشکیل تک پہنچے

jo guzre jan se to paya-e-takmil tak pahunche

nahin mumkin ke koi zist ki tafsil tak pahunche

rahe abjad ke chakkar hi mein jo the fikr se ari

hue fazil wahi jo zauq ki takmil tak pahunche

rahe bartar jahan mein din ke jab tak rahe shaida

hue jab din se ghafil to ham tazlil tak pahunche

pahunchta hai dilail se to insan bad natije par

zara si bat thi kyun us ki tum tawil tak pahunche

tu apni zindagi mein khud ko pahuncha aisi khubi tak

zamana ho tira joya tiri tamsil tak pahunche

rasai jin ki thi sarkar sharq-o-gharb ke dar tak

wo sham-e-din ko le kar hazaron mel tak pahunche

bahut se naujawan ghum ae landan aur pairis tak

koi mard-e-jari ausaf ismail tak pahunche

zamin-e-sher ki araishon hi tak na rakh matlab

takhayyul hai wahi jo halqa-e-jibril tak pahunche

quufi chand dam-e-fikr tak pahunche the ai sair

ye alfaz-e-hasin ashar ki tashkil tak pahunche