زمین دل پہ سبھی آسمان چھوڑ گیا

زمین دل پہ سبھی آسمان چھوڑ گیا

وہ اک یقین تھا لیکن گمان چھوڑ گیا

نئی زمین نیا آسمان چھوڑ گیا

ترا وجود مری داستان چھوڑ گیا

ہر ایک سانس میں کیوں امتحان چھوڑ گیا

نڈھال جسم میں وہ سخت جان چھوڑ گیا

نہ جانے کتنے سوالوں کو دے دیا موقع

وہ بے زبان تھا لیکن بیان چھوڑ گیا

گیا سفر پہ تو پھر لوٹ کر نہیں آیا

وہ اپنے پاؤں کے لیکن نشان چھوڑ گیا

نیا ارادہ نئی منزلوں کو پانے میں

پرانی سوچ پرانی تکان چھوڑ گیا

ذہینؔ دل تھا جو پہلے ہی دے دیا اس کو

اب اک دماغ بچا تھا سو دھیان چھوڑ گیا

zamin-e-dil pe sabhi asman chhor gaya

wo ik yaqin tha lekin guman chhor gaya

nai zamin naya asman chhor gaya

tira wajud miri dastan chhor gaya

har ek sans mein kyun imtihan chhor gaya

nidhal jism mein wo sakht jan chhor gaya

na jane kitne sawalon ko de diya mauqaa

wo be zaban tha lekin bayan chhor gaya

gaya safar pe to phir laut kar nahin aya

wo apne paon ke lekin nishan chhor gaya

naya irada nai manzilon ko pane mein

purani soch purani takan chhor gaya

zahin dil tha jo pahle hi de diya us ko

ab ik dimagh bacha tha so dhyan chhor gaya