جانے کس دور کی سزا ہوں میں

جانے کس دور کی سزا ہوں میں

ابتدا ہوں کہ انتہا ہوں میں

اپنی دھڑکن سے کر مجھے محسوس

صرف سانسوں کا سلسلہ ہوں میں

ٹوٹنا ہی مرا مقدر ہے

خواب ہوں یا کہ آئنہ ہوں میں

مجھ کو سن لے قبول بھی کر لے

ایک ننھی سی التجا ہوں میں

زندگی سے اجل کے دامن تک

چند لمحوں کا فاصلہ ہوں میں

کوئی جھونکا مٹا نہ پایا جسے

نام وہ ریت پہ لکھا ہوں میں

زندگی مجھ سے ہار جائے گی

آزمائش کی انتہا ہوں میں

مجھ سے قائم ہے رونق ہستی

خود کی ہستی سے ہی خفا ہوں میں

اب جو سویا تو سو ہی جاؤں گا

عمر بھر جاگتا رہا ہوں میں

جسم کی قید میں رہا ہوں کبھی

اور کبھی جسم سے رہا ہوں میں

jane kis daur ki saza hun main

ibtida hun ke intiha hun main

apni dharkan se kar mujhe mahsus

sirf sanson ka silsila hun main

tutna hi mira muqaddar hai

khwab hun ya ke aina hun main

mujh ko sun le qubul bhi kar le

ek nanhi si iltija hun main

zindagi se ajal ke daman tak

chand lamhon ka fasla hun main

koi jhonka mita na paya jise

nam wo ret pe likha hun main

zindagi mujh se har jaegi

azmaish ki intiha hun main

mujh se qaim hai raunaq-e-hasti

khud ki hasti se hi khafa hun main

ab jo soya to so hi jaunga

umr bhar jagta raha hun main

jism ki qaid mein raha hun kabhi

aur kabhi jism se raha hun main