ہر آدمی کو خواب دکھانا محال ہے

ہر آدمی کو خواب دکھانا محال ہے

شعلوں میں جیسے پھول کھلانا محال ہے

کاغذ کی ناؤ بھی ہے کھلونے بھی ہیں بہت

بچپن سے پھر بھی ہاتھ ملانا محال ہے

انساں کی شکل ہی میں درندے بھی ہیں مگر

ہر عکس آئنے میں دکھانا محال ہے

مشکل نہیں اتارنا سورج کو تھال میں

لیکن چراغ اس سے جلانا محال ہے

اک بار خود جو لفظوں کے پنجرے میں آ گیا

اس طائر نوا کو اڑانا محال ہے

اپنے لہو کی بھینٹ چڑھانے کے بعد بھی

قدروں کی ہر فصیل تک آنا محال ہے

تا عمر اپنی فکر و ریاضت کے باوجود

خود کو کسی سزا سے بچانا محال ہے

har admi ko khwab dikhana muhal hai

sholon mein jaise phul khilana muhal hai

kaghaz ki nao bhi hai khilaune bhi hain bahut

bachpan se phir bhi hath milana muhal hai

insan ki shakl hi mein darinde bhi hain magar

har aks aine mein dikhana muhal hai

mushkil nahin utarna suraj ko thal mein

lekin charagh us se jalana muhal hai

ik bar khud jo lafzon ke pinjre mein a gaya

is tair-e-nawa ko urana muhal hai

apne lahu ki bhent charhane ke baad bhi

qadron ki har fasil tak ana muhal hai

ta umr apni fikr-o-riyazat ke bawajud

khud ko kisi saza se bachana muhal hai