نگاہوں کو خلا میں ذہن کو دفتر میں رکھ دیں گے

نگاہوں کو خلا میں ذہن کو دفتر میں رکھ دیں گے

مگر اپنے مسائل گھر کے ہیں ہم گھر میں رکھ دیں گے

سلگتے ذہن زخمی فکر نم آنکھیں پریشاں دل

ہم اک اک چیز اپنے شعر کے پیکر میں رکھ دیں گے

متاع فکر نو جب ذہن خوابیدہ میں رکھنی ہے

تو ہم خون قلم بھی اس کے پس منظر میں رکھ دیں گے

ہم ایسے دانش و افکار والے ہیں کہ جب چاہیں

شرر شیشے میں رکھ دیں گے لہو پتھر میں رکھ دیں گے

بدل جائے گا انداز نظر روشن خیالوں کا

اگر ہم رات کی خوش پیکری ساغر میں رکھ دیں گے

لہو بن کر جو بہتا ہے مکاں بن کر جو جلتا ہے

وہ اندیشہ بھی ہم احساس کی چادر میں رکھ دیں گے

کھلی آنکھوں سے دیکھے جائیں گے سورج کے آنگن میں

کچھ ایسے خواب ہم الفاظ کے پیکر میں رکھ دیں گے

تہی دستی ہی جب اپنا مقدر بنتی جائے گی

یقیں کا سارا سرمایہ گماں کے گھر میں رکھ دیں گے

شعور و فن جسے چھو کر فضا میں نور برسائیں

اک ایسی شے بھی ہم مفہوم کے دفتر میں رکھ دیں گے

nigahon ko khala mein zehn ko daftar mein rakh denge

magar apne masail ghar ke hain ham ghar mein rakh denge

sulagte zehn zakhmi fikr nam ankhen pareshan dil

ham ik ik chiz apne sher ke paikar mein rakh denge

mata-e-fikr-e-nau jab zehn khwabida mein rakhni hai

to ham khun-e-qalam bhi us ke pas manzar mein rakh denge

ham aise danish-o-afkar wale hain ke jab chahen

sharar shishe mein rakh denge lahu patthar mein rakh denge

badal jaega andaz-e-nazar raushan khayalon ka

agar ham rat ki khush paikari saghar mein rakh denge

lahu ban kar jo bahta hai makan ban kar jo jalta hai

wo andesha bhi ham ehsas ki chadar mein rakh denge

khuli ankhon se dekhe jaenge suraj ke angan mein

kuchh aise khwab ham alfaz ke paikar mein rakh denge

tahi dasti hi jab apna muqaddar banti jaegi

yaqin ka sara sarmaya guman ke ghar mein rakh denge

shuur-o-fan jise chhu kar faza mein nur barsaen

ik aisi shai bhi ham mafhum ke daftar mein rakh denge