جو شور کرتے رہے شور ہی میں ڈوب گئے

جو شور کرتے رہے شور ہی میں ڈوب گئے

سب اپنے ذوق جنوں کی ندی میں ڈوب گئے

عجیب سانحہ گزرا ہے نکتہ دانوں پر

جس آگہی سے وہ ابھرے اسی میں ڈوب گئے

رفیق بن کے جب آیا نیا خیال کوئی

خوشی کچھ اتنی ملی ہم خوشی میں ڈوب گئے

کسی طرف سے بھی کوئی صدا نہیں آئی

پرندے شام ہی سے خامشی میں ڈوب گئے

اب اپنے ظرف کے تابوت پر ہیں نوحہ کناں

جو لوگ اپنی ہی خوش آگہی میں ڈوب گئے

زبان‌ و لفظ کے اب تک ہزاروں جادوگر

خود اپنے فن کی اندھیری گلی میں ڈوب گئے

ابھر سکے نہ جو حالات کے تھپیڑوں سے

وہ رفتہ رفتہ غم زندگی میں ڈوب گئے

jo shor karte rahe shor hi mein dub gae

sab apne zauq-e-junun ki nadi mein dub gae

ajib saneha guzra hai nukta danon par

jis agahi se wo ubhre isi mein dub gae

rafiq ban ke jab aya naya khayal koi

khushi kuchh itni mili ham khushi mein dub gae

kisi taraf se bhi koi sada nahin ai

parinde sham hi se khamushi mein dub gae

ab apne zarf ke tabut par hain nauha kunan

jo log apni hi khush agahi mein dub gae

zaban-o-lafz ke ab tak hazaron jadugar

khud apne fan ki andheri gali mein dub gae

ubhar sake na jo halat ke thaperon se

wo rafta rafta gham-e-zindagi mein dub gae