کیا دعائے فرسودہ حرف بے اثر مانگوں

کیا دعائے فرسودہ حرف بے اثر مانگوں

تشنگی میں جینے کا اب کوئی ہنر مانگوں

دھوپ دھوپ چل کر بھی جب تھکے نہ ہمراہی

کیسے اپنی خاطر میں سایۂ شجر مانگوں

آئنہ نوازی سے کچھ نہیں ہوا حاصل

خود بنے جو آئینہ اب وہی ہنر مانگوں

اک طرف تعصب ہے اک طرف ریاکاری

ایسی بے پناہی میں کیا سکوں کا گھر مانگوں

میری زندگی میں جو بٹ نہ جائے خانوں میں

مل سکے تو میں ایسا کوئی بام و در مانگوں

لمحہ لمحہ تیزی سے اب زمیں کھسکتی ہے

خود سفر کا عالم ہے کیا کوئی سفر مانگوں

بے طلب ہی دیتا ہے جب ظہیرؔ وہ سب کچھ

کس لیے میں پھر اس سے جنس معتبر مانگوں

kya dua-e-farsuda harf-e-be asar mangun

tishnagi mein jine ka ab koi hunar mangun

dhup dhup chal kar bhi jab thake na hamrahi

kaise apni khatir mein saya-e-shajar mangun

aina nawazi se kuchh nahin hua hasil

khud bane jo aina ab wahi hunar mangun

ik taraf taassub hai ik taraf riyakari

aisi be panahi mein kya sukun ka ghar mangun

meri zindagi mein jo bat na jae khanon mein

mil sake to main aisa koi bam-o-dar mangun

lamha lamha tezi se ab zamin khisakti hai

khud safar ka alam hai kya koi safar mangun

be talab hi deta hai jab zahir wo sab kuchh

kis liye main phir us se jins-e-motabar mangun