تخلیق کی دنیا تو اسرار کی دنیا ہے

تخلیق کی دنیا تو اسرار کی دنیا ہے

ہر فکر میں جنت ہے ہر لفظ میں صحرا ہے

آئینۂ فطرت میں ہر حسن انوکھا ہے

دریاؤں میں صحرا ہے صحراؤں میں دریا ہے

ہر حادثۂ نو کی لکھی ہے خبر اس پر

انسان کا چہرہ کیا اخبار کا چہرہ ہے

اس تلخ حقیقت کو تسلیم کیا جائے

مفلوج تقاضوں کا ہر ذہن پہ پہرہ ہے

تفریق کی لعنت کے قائل ہوئے ہم ورنہ

شیشہ بھی تو پتھر ہے پتھر بھی تو شیشہ ہے

جذبات کی عکاسی جو لفظ نہ کر پائے

وہ دشت معانی کا مفلوج پرندہ ہے

اس عہد سیاست کی تھوڑی سی جھلک دیکھی

بستی میں خموشی ہے مرگھٹ پہ تماشا ہے

انساں کو ظہیرؔ اس کا احساس نہیں شاید

پھولوں کی رفاقت میں کانٹا بھی مہکتا ہے

takhliq ki duniya to asrar ki duniya hai

har fikr mein jannat hai har lafz mein sahra hai

aina-e-fitrat mein har husn anokha hai

dariyaon mein sahra hai sahraon mein dariya hai

har hadisa-e-nau ki likhi hai khabar us par

insan ka chehra kya akhbar ka chehra hai

is talkh haqiqat ko taslim kiya jae

mafluj taqazon ka har zehn pe pahra hai

tafriq ki laanat ke qail hue ham warna

shisha bhi to patthar hai patthar bhi to shisha hai

jazbat ki akkasi jo lafz na kar pae

wo dasht-e-maani ka mafluj parinda hai

is ahd-e-siyasat ki thori si jhalak dekhi

basti mein khamoshi hai marghut pe tamasha hai

insan ko zahir us ka ehsas nahin shayad

phulon ki rifaqat mein kanta bhi mahakta hai