حقائق کتنے اے اہل نظر ہم بھول جاتے ہیں

حقائق کتنے اے اہل نظر ہم بھول جاتے ہیں

چھپے ہوتے ہیں پتھر میں گہر ہم بھول جاتے ہیں

تپش شبنم میں ہو پیدا تو ہم حیران ہو جائیں

مگر شعلوں کا انداز سفر ہم بھول جاتے ہیں

برسنا آگ کا پتھر کا ہم کو یاد رہتا ہے

دعاؤں میں بھی ہوتا ہے اثر ہم بھول جاتے ہیں

رہا ہے مدتوں سے ایسا ہی انداز نقد اپنا

اندھیرے یاد رہتے ہیں سحر ہم بھول جاتے ہیں

ہمیشہ یاد رکھتے ہیں شکست و ریخت کی باتیں

مگر کیا شے ہے اعجاز ہنر ہم بھول جاتے ہیں

ظہیرؔ اپنے قلم کی ہیں کرشمہ سازیاں ایسی

کہ اپنی ذات کے سب خیر و شر ہم بھول جاتے ہیں

haqaiq kitne ai ahl-e-nazar ham bhul jate hain

chhupe hote hain patthar mein guhar ham bhul jate hain

tapish shabnam mein ho paida to ham hairan ho jaen

magar sholon ka andaz-e-safar ham bhul jate hain

barasna ag ka patthar ka ham ko yad rahta hai

duaon mein bhi hota hai asar ham bhul jate hain

raha hai muddaton se aisa hi andaz-e-naqd apna

andhere yad rahte hain sahar ham bhul jate hain

hamesha yad rakhte hain shikast-o-rekht ki baten

magar kya shai hai ejaz-e-hunar ham bhul jate hain

zahir apne qalam ki hain karishma saziyan aisi

ke apni zat ke sab khair-o-shar ham bhul jate hain