پھولا پھلا شجر تو ثمر پر بھی آئے گا

پھولا پھلا شجر تو ثمر پر بھی آئے گا

لیکن اسی لحاظ سے پتھر بھی آئے گا

حالات جب بھی شہر کے فلمائے جائیں گے

پردے پہ میرے قتل کا منظر بھی آئے گا

بے چہرہ پھر رہا ہوں مگر اس یقیں کے ساتھ

آئینہ میرے قد کے برابر بھی آئے گا

کب تک کوئی چھپے گا عداوت کے غار میں

دشمن کبھی تو سامنے کھل کر بھی آئے گا

بے وجہ رنجشوں سے دلوں کو بچایئے

ذہنوں کا بھید بھاؤ لبوں پر بھی آئے گا

بہتر ہے دوستو کہ یہیں ڈال دو پڑاؤ

آگے بڑھے تو شہر ستم گر بھی آئے گا

ابھریں گے پستیوں سے بھی اک روز ہم ظفرؔ

اونچائیوں پہ اپنا مقدر بھی آئے گا

phula phala shajar to samar par bhi aega

lekin isi lihaz se patthar bhi aega

halat jab bhi shahr ke filmae jaenge

parde pe mere qatl ka manzar bhi aega

be chehra phir raha hun magar is yaqin ke sath

aina mere qad ke barabar bhi aega

kab tak koi chhupega adawat ke ghar mein

dushman kabhi to samne khul kar bhi aega

be wajh ranjishon se dilon ko bachaiye

zehnon ka bhed bhao labon par bhi aega

behtar hai dosto ke yahin dal do parao

age barhe to shahr-e-sitam gar bhi aega

ubhrenge pastiyon se bhi ik roz ham zafar

unchaiyon pe apna muqaddar bhi aega