دل میں رکھ زخم نوا راہ میں کام آئے گا

دل میں رکھ زخم نوا راہ میں کام آئے گا

دشت بے سمت میں اک ہو کا مقام آئے گا

اس طرح پڑھتا ہوں بہتے ہوئے دریا کی کتاب

صفحۂ آب پر اک عکس پیام آئے گا

قریۂ جاں میں تھے یادوں کے شناسا چہرے

اجنبی شہر میں کس کس کا سلام آئے گا

مصلحت کیش تو گلہائے ستائش سے لدے

سچ کے ہاتھوں میں وہی زہر کا جام آئے گا

رقص رفتار سے کیا روند چلا پھولوں کو

آگ پر چل کہ تجھے لطف خرام آئے گا

خنجر زہر وفا دل میں چھپائے کب سے

منتظر ہوں کہ ادھر وہ سر شام آئے گا

دیدۂ دل سے ظفرؔ خواب بھی چھن جائیں گے

وقت کہتا ہے کہ اب ایسا نظام آئے گا

dil mein rakh zakhm nawa rah mein kam aega

dasht-e-be samt mein ik ho ka maqam aega

is tarah parhta hun bahte hue dariya ki kitab

safha-e-ab par ik aks payam aega

qarya-e-jan mein the yadon ke shanasa chehre

ajnabi shahr mein kis kis ka salam aega

maslahat kesh to gulhae sataish se lade

sach ke hathon mein wahi zahr ka jam aega

raqs-e-raftar se kya raund chala phulon ko

ag par chal ke tujhe lutf-e-khiram aega

khanjar-e-zahr-e-wafa dil mein chhupae kab se

muntazir hun ke idhar wo sar-e-sham aega

dida-e-dil se zafar khwab bhi chhin jaenge

waqt kahta hai ke ab aisa nizam aega