ٹوٹے تختے پر سمندر پار کرنے آئے تھے

ٹوٹے تختے پر سمندر پار کرنے آئے تھے

ہم سفر طوفان غم سے پیار کرنے آئے تھے

ڈر کے جنگل کی فضا سے پیچھے پیچھے ہو لیے

لوگ چھپ کر قافلے پر وار کرنے آئے تھے

اس گنہ پر مل رہی ہے سنگ ساری کی سزا

پتھروں کو نیند سے بیدار کرنے آئے تھے

لوگ سمجھے اپنی سچائی کی خاطر جان دی

ورنہ ہم تو جرم کا اقرار کرنے آئے تھے

وہ بھی کرب خود بیانی میں ظفرؔ غلطاں ملا

جس سے اپنی ذات کا اظہار کرنے آئے تھے

tute takhte par samundar par karne ae the

ham safar tufan-e-gham se pyar karne ae the

dar ke jangal ki faza se pichhe pichhe ho liye

log chhup kar qafile par war karne ae the

is gunah par mil rahi hai sang sari ki saza

pattharon ko nind se bedar karne ae the

log samjhe apni sachchai ki khatir jan di

warna ham to jurm ka iqrar karne ae the

wo bhi karb-e-khud bayani mein zafar ghaltan mila

jis se apni zat ka izhar karne ae the