طبع روشن کو مری کچھ اس طرح بھائی غزل

طبع روشن کو مری کچھ اس طرح بھائی غزل

جب بھی میں تنہا ہوا ہوں مجھ کو یاد آئی غزل

جب بھی دن ڈوبا ہوئی فکر سخن لاحق مجھے

شام ہوتے ہی مرے ساغر میں در آئی غزل

یاد جب آئے مجھے بچھڑے ہوئے ساتھی مرے

کانپتے ہونٹوں کی ہر سلوٹ پہ لہرائی غزل

پھول سی آنکھوں میں انگارے لیے پھرتا ہوں میں

رات بھر سونے کہاں دیتی ہے ہرجائی غزل

رنگ سوچوں کے بکھر جاتے ہیں احساسات پر

ذہن میں شاعر کے جب لیتی ہے انگڑائی غزل

ناگہاں لوگوں نے دل میرا دکھایا تو مجھے

یوں لگا گویا مرے دکھ بانٹنے آئی غزل

مجھ کو یاد آیا بہت وہ نا مراد عشق میرؔ

دل کے تاروں پر ظفرؔ مطرب نے جب گائی غزل

tab-e-raushan ko miri kuchh is tarah bhai ghazal

jab bhi main tanha hua hun mujh ko yad ai ghazal

jab bhi din duba hui fikr-e-sukhan lahaq mujhe

sham hote hi mire saghar mein dar ai ghazal

yad jab ae mujhe bichhre hue sathi mire

kanpte honton ki har salut pe lahrai ghazal

phul si ankhon mein angare liye phirta hun main

rat bhar sone kahan deti hai harjai ghazal

rang sochon ke bikhar jate hain ehsasat par

zehn mein shayar ke jab leti hai angrai ghazal

nagahan logon ne dil mera dikhaya to mujhe

yun laga goya mire dukh bantne ai ghazal

mujh ko yad aya bahut wo na murad-e-ishq mir

dil ke taron par zafar mutrib ne jab gai ghazal