شب کے تاریک سمندر سے گزر آیا ہوں

شب کے تاریک سمندر سے گزر آیا ہوں

ٹوٹا تارہ ہوں خلاؤں سے اتر آیا ہوں

تجھ سے جو ہو نہ سکا کام وہ کر آیا ہوں

آسماں چھوڑ کے دھرتی پہ اتر آیا ہوں

دشت تنہائی میں بکھرا ہوں ہواؤں کی طرح

اک صدا بن کے دل سنگ میں در آیا ہوں

جانے کس خوف سے پھرتا ہوں میں گھبرایا ہوا

کیا بلا بن کے میں خود اپنے ہی سر آیا ہوں

دل شکستہ سے در و بام کی مدت کے بعد

خیریت پوچھنے اجڑے ہوئے گھر آیا ہوں

شوخ راتوں کے لئے میرے تعاقب میں نہ آ

درد کا چاند ہوں خوابوں میں نظر آیا ہوں

اپنا سایہ بھی ظفرؔ مجھ کو نہ پہچان سکا

کس نئے بھیس میں میں آج ادھر آیا ہوں

shab ke tarik samundar se guzar aya hun

tuta tara hun khalaon se utar aya hun

tujh se jo ho na saka kam wo kar aya hun

asman chhor ke dharti pe utar aya hun

dasht-e-tanhai mein bikhra hun hawaon ki tarah

ik sada ban ke dil-e-sang mein dar aya hun

jane kis khauf se phirta hun main ghabraya hua

kya bala ban ke main khud apne hi sar aya hun

dil shikasta se dar-o-bam ki muddat ke baad

khairiyat puchhne ujre hue ghar aya hun

shokh raton ke liye mere taaqub mein na a

dard ka chand hun khwabon mein nazar aya hun

apna saya bhi zafar mujh ko na pahchan saka

kis nae bhes mein main aj idhar aya hun