ابھرتے ڈوبتے تاروں کے بھید کھولے گا

ابھرتے ڈوبتے تاروں کے بھید کھولے گا

فصیل شب سے اتر کر کوئی تو بولے گا

یہ عہد وہ ہے جو قائل نہیں صحیفوں کا

یہ حرف حرف کو مصلوب کر کے تولے گا

اتر ہی جائے گا رگ رگ میں آج زہر سکوت

وہ پیار سے مرے لہجے میں شہد گھولے گا

مرا نصیب ہی ٹھہرا جو رابطوں کی شکست

طلسم جاں کا بھی یہ قفل کوئی کھولے گا

جو سونے دل میں کہیں بس گیا کوئی آسیب

جہاں بھی جاؤ گے سایہ سا ساتھ ہو لے گا

ہے آج وقت ظفرؔ دل کی بات کہہ ڈالیں

کبھی تو وہ بھی ذرا اپنا دل ٹٹولے گا

ubharte dubte taron ke bhed kholega

fasil-e-shab se utar kar koi to bolega

ye ahd wo hai jo qail nahin sahifon ka

ye harf harf ko maslub kar ke tolega

utar hi jaega rag rag mein aj zahr sukut

wo pyar se mire lahje mein shahd gholega

mira nasib hi thahra jo rabton ki shikast

tilism-e-jan ka bhi ye qufl koi kholega

jo sone dil mein kahin bas gaya koi aseb

jahan bhi jaoge saya sa sath ho lega

hai aj waqt zafar dil ki bat kah dalen

kabhi to wo bhi zara apna dil tatolega