سزا ملی ہے بکھرنے کی اور سمٹنے کی

سزا ملی ہے بکھرنے کی اور سمٹنے کی

خطا ہوئی تھی ہواؤں سے کل لپٹنے کی

کتاب دل کی جبیں پر رقم تھی وہ تحریر

کسی میں تاب نہ تھی پھر ورق الٹنے کی

صبا نے بات اڑا لی مہکتے رنگوں سے

کسی درخت سے اک بیل کے لپٹنے کی

دلوں میں ٹوٹ گئے رابطوں کے سب ٹانکے

خبر ہے ریل کے نیچے کسی کے کٹنے کی

نہ پار ہو سکی لمحوں کی تیز رو ندی

لگی ہے چوٹ کہیں کائی پر رپٹنے کی

تلاش کرتا ہوں انجام خواب ریزی کا

یہ زندگی ہے سزا کچی نیند اچٹنے کی

بنے ہیں کتنے ہی پتھر کے اس خرابے میں

خطا طلسم سفر سے تھی رخ پلٹنے کی

saza mili hai bikharne ki aur simatne ki

khata hui thi hawaon se kal lipatne ki

kitab-e-dil ki jabin par raqam thi wo tahrir

kisi mein tab na thi phir waraq ulatne ki

saba ne bat ura li mahakte rangon se

kisi darakht se ik bel ke lipatne ki

dilon mein tut gae rabton ke sab tanke

khabar hai rel ke niche kisi ke katne ki

na par ho saki lamhon ki tez ro naddi

lagi hai chot kahin kai par rapatne ki

talash karta hun anjam khwab rezi ka

ye zindagi hai saza kachchi nind achtane ki

bane hain kitne hi patthar ke is kharabe mein

khata tilism-e-safar se thi rukh palatne ki