وقت کا سانس بھی طوفان کا ٹھہراؤ لگے

وقت کا سانس بھی طوفان کا ٹھہراؤ لگے

اس کڑی رت میں کہاں ٹوٹی ہوئی ناؤ لگے

ہر نفس روح میں اک زہر بھرا گھاؤ لگے

ہر صدا چیختے الفاظ کا پتھراؤ لگے

خیمہ زن ہوگی اسی جا پہ سواری گل کی

اے صبا دشت میں پھر خون کا چھڑکاؤ لگے

پھر سے تجدید ستم کی نئی صورت نکلی

حد سے بدلا ہوا احباب کا برتاؤ لگے

لوگ کہتے ہیں وفا جنس گراں مایہ ہے

شہر میں لے تو چلیں دیکھ لیں کیا بھاؤ لگے

ہر ادا اس کی ظفرؔ جوئے رواں کی مانند

دل میں جھانکوں تو سمندر کا سا پھیلاؤ لگے

waqt ka sans bhi tufan ka thahrao lage

is kari rut mein kahan tuti hui nao lage

har nafas ruh mein ik zahr bhara ghao lage

har sada chikhte alfaz ka pathrao lage

khema zan hogi isi ja pe sawari gul ki

ai saba dasht mein phir khun ka chhirkao lage

phir se tajdid-e-sitam ki nai surat nikli

had se badla hua ahbab ka bartao lage

log kahte hain wafa jins-e-giran maya hai

shahr mein le to chalen dekh len kya bhao lage

har ada us ki zafar ju-e-rawan ki manind

dil mein jhankun to samundar ka sa phailao lage