جاری ہے کب سے معرکہ یہ جسم و جاں میں سرد سا

جاری ہے کب سے معرکہ یہ جسم و جاں میں سرد سا

چھپ چھپ کے کوئی مجھ میں ہے مجھ سے ہی ہم نبرد سا

جاتے کہاں کہ زیر پا تھا ایک بحر خوں کنار

اڑتے تو بار سر بنا اک دشت لاجورد سا

کس چاندنی کی آنکھ سے بکھری شفق کی ریت میں

موتی سا ڈھل کے گر پڑا شام کے دل کا درد سا

نازک لبوں کی پنکھڑیاں تھرتھرا تھرتھرا گئیں

تیز رو باد درد تھی چہرہ تھا گرد گرد سا

مہندی رچی بہار کا آنگن خوشی سے بھر گیا

مہماں ہے گھر میں آج وہ چاند سنہرا زرد سا

دیکھا تو اہل شہر سب اس کو ہی لینے آئے تھے

اک اجنبی جو ساتھ تھا راہ میں کم نورد سا

کس دست ناز میں ظفرؔ آئینۂ وجود تھا

بکھرا ہوں کائنات میں ہر سمت فرد فرد سا

jari hai kab se marka ye jism-o-jan mein sard sa

chhup chhup ke koi mujh mein hai mujh se hi ham nabard sa

jate kahan ke zer-e-pa tha ek bahr-e-khun kanar

urte to bar-e-sar bana ik dasht-e-lajward sa

kis chandni ki ankh se bikhri shafaq ki ret mein

moti sa dhal ke gir para sham ke dil ka dard sa

nazuk labon ki pankhuriyan tharthara tharthara gain

tez ro bad dard thi chehra tha gard gard sa

mehndi rachi bahar ka angan khushi se bhar gaya

mehman hai ghar mein aj wo chand sunahra zard sa

dekha to ahl-e-shahr sab us ko hi lene ae the

ik ajnabi jo sath tha rah mein kam naward sa

kis dast-e-naz mein zafar aina-e-wajud tha

bikhra hun kainat mein har samt fard fard sa