محشر امید پہلے دل میں پیدا کیجئے

محشر امید پہلے دل میں پیدا کیجئے

اس کا جلوہ دیکھنے کی پھر تمنا کیجئے

اک نیا عالم بقدر شوق پیدا کیجئے

ہر نظر کو حسن کی محو تماشا کیجئے

بڑھتے بڑھتے ہو گئی وحشت محیط کائنات

لطف تو جب ہے کہ ہر ذرے کو صحرا کیجئے

چاہتا ہے وسعتیں ان کا فریب التفات

دل کے ہر گوشے میں پیدا ایک دنیا کیجئے

یوں نیاز عشق میں ہو جائے تکمیل وفا

آستان ناز کے ذروں کو سجدہ کیجئے

جلوۂ گل میں دکھاتے ہیں تجلی حسن کی

دیکھنے والوں سے کہتے ہیں کہ دیکھا کیجئے

جھوم کر میخانے پہ چھائی گھٹا ہے اے ذبیحؔ

توڑ کر اب توبہ شغل جام و مینا کیجئے

mahshar-e-ummid pahle dil mein paida kijiye

us ka jalwa dekhne ki phir tamanna kijiye

ik naya alam baqadr-e-shauq paida kijiye

har nazar ko husn ki mahw-e-tamasha kijiye

barhte barhte ho gai wahshat muhit-e-kainat

lutf to jab hai ke har zarre ko sahra kijiye

chahta hai wusaten un ka fareb-e-iltifat

dil ke har goshe mein paida ek duniya kijiye

yun niyaz-e-ishq mein ho jae takmil-e-wafa

astan-e-naz ke zarron ko sajda kijiye

jalwa-e-gul mein dikhate hain tajalli husn ki

dekhne walon se kahte hain ke dekha kijiye

jhum kar maikhane pe chhai ghata hai ai zabih

tor kar ab tauba shaghl-e-jam-o-mina kijiye