ہجر کی شب دراز ہے دور ابھی سحر بھی ہے

ہجر کی شب دراز ہے دور ابھی سحر بھی ہے

اور ہماری زندگی شمع سے مختصر بھی ہے

آنکھوں میں آ گئی حیا آئنے پر نظر بھی ہے

اب تو انہیں یقیں ہوا حسن میں کچھ اثر بھی ہے

ایک نگاہ یاس کی تاب نہ لا سکا کوئی

حسن میں جو اثر نہیں عشق میں وہ اثر بھی ہے

بدلی نظر جو آپ کی میرا جہاں بدل گیا

ورنہ یہاں ابھی وہی شام بھی ہے سحر بھی ہے

جلوے ترے سمیٹ کر بھر لیا دامن نظر

عشق بھی میرا ہے حسیں میری حسیں نظر بھی ہے

کتنے وہ نامراد تھے مٹ کے جو بے نشاں ہوئے

تم نے جنہیں مٹا دیا ان کی تمہیں خبر بھی ہے

تکملۂ نیاز عشق کیوں نہ کروں میں اے ذبیحؔ

سجدے کو ہے وہ آستاں دوش پہ میرے سر بھی ہے

hijr ki shab daraz hai dur abhi sahar bhi hai

aur hamari zindagi shama se mukhtasar bhi hai

ankhon mein a gai haya aine par nazar bhi hai

ab to unhen yaqin hua husn mein kuchh asar bhi hai

ek nigah-e-yas ki tab na la saka koi

husn mein jo asar nahin ishq mein wo asar bhi hai

badli nazar jo ap ki mera jahan badal gaya

warna yahan abhi wahi sham bhi hai sahar bhi hai

jalwe tire samet kar bhar liya daman-e-nazar

ishq bhi mera hai hasin meri hasin nazar bhi hai

kitne wo namurad the mit ke jo be nishan hue

tum ne jinhen mita diya un ki tumhen khabar bhi hai

takmila-e-niyaz-e-ishq kyun na karun main ai zabih

sajde ko hai wo astan dosh pe mere sar bhi hai