قدرت نے دی ہے مجھ کو بہار آفریں نظر

قدرت نے دی ہے مجھ کو بہار آفریں نظر

کتنی حسیں نظر ہے یہ کتنی حسیں نظر

دیکھی نشان سجدے میں تصویر حسن کی

روشن ہوئی تو بن گئی میری حسیں نظر

مدفن میں ہم تو آئے تھے دنیا کو چھوڑ کر

دنیا اک اور آتی ہے زیر زمیں نظر

چھپ کر حجاب ناز میں بھی وہ نہ چھپ سکے

اللہ رے شوق دید کی پہنچی وہیں نظر

وہ آئیں بھی تو میں انہیں دیکھوں گا کس طرح

دیتی نہیں ہے کام دم واپسیں نظر

مجبوریاں بھی ساتھ رہیں اختیار میں

رہتا ہے دل میں وہ مگر آتا نہیں نظر

میں حال بے خودی بھی کہوں تم سے کیا ذبیحؔ

بیٹھا ہوا کہیں ہوں مگر ہے کہیں نظر

qudrat ne di hai mujh ko bahar afrin nazar

kitni hasin nazar hai ye kitni hasin nazar

dekhi nishan sajde mein taswir husn ki

raushan hui to ban gai meri hasin nazar

madfan mein ham to ae the duniya ko chhor kar

duniya ik aur ati hai zer-e-zamin nazar

chhup kar hijab-e-naz mein bhi wo na chhup sake

allah re shauq-e-did ki pahunchi wahin nazar

wo aen bhi to main unhen dekhunga kis tarah

deti nahin hai kam dam-e-wapasen nazar

majburiyan bhi sath rahen ikhtiyar mein

rahta hai dil mein wo magar ata nahin nazar

main hal-e-be khudi bhi kahun tum se kya zabih

baitha hua kahin hun magar hai kahin nazar