ساقی مئے وحدت کا وہ جام پلا مجھ کو

ساقی مئے وحدت کا وہ جام پلا مجھ کو

مٹ جائے خودی دل سے مل جائے خدا مجھ کو

دنیا میں ملا زاہد جنت کا مزہ مجھ کو

حاصل ہے بہاروں میں اک کیف نیا مجھ کو

دیکھا تھا ترا جلوہ جب ہوش نہ تھا مجھ کو

اب یاد نہیں آتا کچھ اس کے سوا مجھ کو

یہ مرحلے طے ہوں گے دنیا میں محبت کے

پہنچائے گا منزل تک خود ذوق فنا مجھ کو

کیا ان کو سناؤں میں افسانۂ بربادی

آتی ہے نظر اس میں کچھ دل کی خطا مجھ کو

جب اپنی حقیقت کو میں خود ہی نہیں سمجھا

کیا تیری خبر مجھ کو کیا تیرا پتہ مجھ کو

کیا ان کا بگڑتا ہے سجدوں سے ذبیحؔ اپنے

کیوں آنکھ دکھاتے ہیں نقش کف پا مجھ کو

saqi mai-e-wahdat ka wo jam pila mujh ko

mit jae khudi dil se mil jae khuda mujh ko

duniya mein mila zahid jannat ka maza mujh ko

hasil hai baharon mein ik kaif naya mujh ko

dekha tha tira jalwa jab hosh na tha mujh ko

ab yad nahin ata kuchh us ke siwa mujh ko

ye marhale tai honge duniya mein mohabbat ke

pahunchaega manzil tak khud zauq-e-fana mujh ko

kya un ko sunaun main afsana-e-barbadi

ati hai nazar is mein kuchh dil ki khata mujh ko

jab apni haqiqat ko main khud hi nahin samjha

kya teri khabar mujh ko kiya tera pata mujh ko

kya un ka bigarta hai sajdon se zabih apne

kyun ankh dikhate hain naqsh-e-kaf-e-pa mujh ko