کچھ لوگ جو نخوت سے مجھے گھور رہے ہیں

کچھ لوگ جو نخوت سے مجھے گھور رہے ہیں

ماحول سے شاید یہ بہت دور رہے ہیں

کیا کہیے کہ کیا ہو گیا اس شہر کا عالم

جس شہر میں الفت کے بھی دستور رہے ہیں

مجبور کسے کہتے ہیں یہ کون بتائے

پوچھے کوئی ان سے کہ جو مجبور رہے ہیں

کچھ لوگ سر دار رہے ہوں تو رہے ہوں

ہم ہیں کہ بہر طور سر طور رہے ہیں

ہنستے ہوئے چہروں پہ نہ جا سینوں میں ان کے

حالات کے ٹکراؤ سے ناسور رہے ہیں

اے شیخ غنیمت ہے اگر ہم کو سمجھ لو

ہم منصب تصدیق پہ مامور رہے ہیں

اک تم کہ خدائی کے بھی دعوے رہے تم کو

اک ہم کہ اس اقرار سے معذور رہے ہیں

سکان حرم کیا ہیں یہ مجھ سے کوئی پوچھے

اللہ کے گھر میں بھی یہ مغرور رہے ہیں

احسان بڑا بوجھ ہے اس خوف سے یاورؔ

دیوار کے سائے سے بھی ہم دور رہے ہیں

kuchh log jo nakhwat se mujhe ghur rahe hain

mahaul se shayad ye bahut dur rahe hain

kya kahiye ke kya ho gaya is shahr ka alam

jis shahr mein ulfat ke bhi dastur rahe hain

majbur kise kahte hain ye kaun batae

puchhe koi un se ke jo majbur rahe hain

kuchh log sar-e-dar rahe hun to rahe hun

ham hain ke bahar taur sar-e-tur rahe hain

hanste hue chehron pe na ja sinon mein un ke

halat ke takrao se nasur rahe hain

ai shaikh ghanimat hai agar ham ko samajh lo

ham mansab tasdiq pe mamur rahe hain

ik tum ke khudai ke bhi daawe rahe tum ko

ik ham ke is iqrar se maazur rahe hain

sukin-e-haram kya hain ye mujh se koi puchhe

allah ke ghar mein bhi ye maghrur rahe hain

ehsan bara bojh hai is khauf se yawar

diwar ke sae se bhi ham dur rahe hain