بھیگی پلکیں شوق کا عالم وقت کا دھارا کیا نہیں دیکھا

بھیگی پلکیں شوق کا عالم وقت کا دھارا کیا نہیں دیکھا

ہنستے آنسو تلخ تبسم میٹھا غصہ کیا نہیں دیکھا

چھلنی سینے روشن چہرے خونیں آنکھیں رنگیں دامن

ٹھنڈی آہیں ویراں نظریں حشر تمنا کیا نہیں دیکھا

راہ پہ پہرے نطق پہ قدغن شوق کی یورش دل کی دھڑکن

بولتی نظریں بوجھل پلکیں غمگیں چہرہ کیا نہیں دیکھا

سوتی قسمت جاگتے انساں اجڑی بستی شمع فروزاں

جھوٹے قصے الٹی تہمت بات کا بننا کیا نہیں دیکھا

بکھری زلفیں الجھی باتیں آنکھ میں شوخی لب پہ تبسم

کھلتی کلیاں جھومتی ڈالی حشر سراپا کیا نہیں دیکھا

بزم چراغاں جھوٹی خوشیاں نخوت ساقی تشنہ دہانی

گردش ساغر عالم مستی تندیٔ صبا کیا نہیں دیکھا

پھول سی باہیں لرزاں سینہ سانس الجھتے بھولی باتیں

نیچی نظریں پہلی لغزش دل کا تقاضا کیا نہیں دیکھا

یاورؔ ہم کو پا نہ سکو گے جیسے اب ہیں ایسے کب تھے

دل کی نزاکت جرم محبت کفر تمنا کیا نہیں دیکھا

آج بھی یاورؔ ہنستے ہنستے آنکھ میں آنسو آ جاتے ہیں

درد کی موجیں خون کی لہریں آگ کا دریا کیا نہیں دیکھا

bhigi palken shauq ka alam waqt ka dhara kya nahin dekha

hanste ansu talkh tabassum mitha ghussa kya nahin dekha

chhalni sine raushan chehre khunin ankhen rangin daman

thandi ahen wiran nazren hashr tamanna kya nahin dekha

rah pe pahre nutq pe qadghan shauq ki yurish dil ki dharkan

bolti nazren bojhal palken ghamgin chehra kya nahin dekha

soti qismat jagte insan ujri basti shama farozan

jhute qisse ulti tohmat bat ka banna kya nahin dekha

bikhri zulfen uljhi baten ankh mein shokhi lab pe tabassum

khulti kaliyan jhumti dali hashr sarapa kya nahin dekha

bazm-e-charaghan jhuti khushiyan nakhwat saqi tishna dahani

gardish saghar alam masti tundi-e-saba kya nahin dekha

phul si bahen larzan sina sans ulajhte bhuli baten

nichi nazren pahli laghzish dil ka taqaza kya nahin dekha

yawar ham ko pa na sakoge jaise ab hain aise kab the

dil ki nazakat jurm-e-mohabbat kufr-e-tamanna kya nahin dekha

aj bhi yawar hanste hanste ankh mein ansu a jate hain

dard ki maujen khun ki lahren ag ka dariya kya nahin dekha