غم چھپاؤں کہ آشکار کروں

غم چھپاؤں کہ آشکار کروں

کون سی وضع اختیار کروں

حادثوں سے نگاہ چار کروں

غم کے لمحوں کو شاہکار کروں

اور کیا ہے جو نذر یار کروں

جی میں آتا ہے جاں نثار کروں

زندگی کو ہی جب ثبات نہیں

اور پھر کس کا اعتبار کروں

تم بھی محبوب زندگی بھی عزیز

تم کو چاہوں کہ خود سے پیار کروں

اور بھی مشغلے ہیں وحشت کے

کیوں گریباں ہی تار تار کروں

کیا قیامت سے کم ہے شام فراق

اور کس دن کا انتظار کروں

ہر سہارا ہے جب ترا محتاج

کیوں سہاروں پہ انحصار کروں

ضبطؔ جب ضبط غم کی ہے تاکید

کیوں نہ یہ جبر اختیار کروں

gham chhupaun ke ashkar karun

kaun si waza ikhtiyar karun

hadson se nigah char karun

gham ke lamhon ko shahkar karun

aur kya hai jo nazr-e-yar karun

ji mein ata hai jan nisar karun

zindagi ko hi jab sabat nahin

aur phir kis ka etibar karun

tum bhi mahbub zindagi bhi aziz

tum ko chahun ke khud se pyar karun

aur bhi mashghale hain wahshat ke

kyun gareban hi tar tar karun

kya qayamat se kam hai sham-e-firaq

aur kis din ka intizar karun

har sahara hai jab tira mohtaj

kyun saharon pe inhisar karun

zabt jab zabt-e-gham ki hai takid

kyun na ye jabr ikhtiyar karun