گھپ اندھیرے میں اجالوں کی طرح ملتا ہے

گھپ اندھیرے میں اجالوں کی طرح ملتا ہے

ہائے وہ غیر جو اپنوں کی طرح ملتا ہے

اپنے رہتے ہیں کناروں کی طرح دور ہی دور

غیر اب ٹوٹ کے موجوں کی طرح ملتا ہے

کون کہتا ہے کہ میں بھول گیا ہوں اس کو

میری آنکھوں سے جو خوابوں کی طرح ملتا ہے

حسن اس دور میں ارزاں ہے سر کوچہ و بام

عشق اب پردہ نشینوں کی طرح ملتا ہے

وقت آئینہ کردار و عمل ہے گویا

یہی دشمن یہی یاروں کی طرح ملتا ہے

کیسے کہئے کہ یہی چہرہ ہے اصلی چہرہ

ہر ریاکار فقیروں کی طرح ملتا ہے

دل جب اخلاص کی خوشبو سے مہک اٹھتا ہے

لطف نیکی میں گناہوں کی طرح ملتا ہے

ہر طلب گار یہ معیار عطا کیا جانے

غم بھی اس بزم میں تحفوں کی طرح ملتا ہے

نہ کھلا ضبطؔ کی افتاد طبیعت کا طلسم

پارسا لگتا ہے رندوں کی طرح ملتا ہے

ghap andhere mein ujalon ki tarah milta hai

hae wo ghair jo apnon ki tarah milta hai

apne rahte hain kinaron ki tarah dur hi dur

ghair ab tut ke maujon ki tarah milta hai

kaun kahta hai ke main bhul gaya hun us ko

meri ankhon se jo khwabon ki tarah milta hai

husn is daur mein arzan hai sar-e-kucha-o-bam

ishq ab parda nashinon ki tarah milta hai

waqt aina kirdar-o-amal hai goya

yahi dushman yahi yaron ki tarah milta hai

kaise kahiye ke yahi chehra hai asli chehra

har riyakar faqiron ki tarah milta hai

dil jab ikhlas ki khushbu se mahak uthta hai

lutf neki mein gunahon ki tarah milta hai

har talab gar ye meyar ata kya jane

gham bhi is bazm mein tohfon ki tarah milta hai

na khula zabt ki uftad tabiat ka tilism

parsa lagta hai rindon ki tarah milta hai