شب بھر تصورات کا میلہ لگا رہا

شب بھر تصورات کا میلہ لگا رہا

سب سو گئے تو گھر میں مرے رتجگا رہا

کل ان لبوں پہ یوں مرا ذکر وفا رہا

وجدان جھومتا رہا وہ بولتا رہا

برسوں یہی مزاج سیاست بنا رہا

مجرم کی طرح شہر میں ہر بے خطا رہا

گھر سے نکل کے بند گلی میں پہنچ گئے

منزل ملی نہ گھر کا کوئی راستا رہا

میں چپ نہ رہ سکا لب تصویر کی طرح

میں آئنہ تھا آئنہ سچ بولتا رہا

عیاریٔ خرد کا فسوں کام کر گیا

اہل جنوں کی عقل پہ پردہ پڑا رہا

اللہ رے بے‌ شعوریٔ دانش کہ عمر بھر

وہ میرے ساتھ تھا میں اسے ڈھونڈھتا رہا

کوشش کے باوجود چھپائے نہ چھپ سکا

ہر قہقہے کے لہجہ میں غم بولتا رہا

میں ضبطؔ سنگ میل سمجھتا رہا جسے

وہ شخص میری راہ کا پتھر بنا رہا

shab bhar tasawwurat ka mela laga raha

sab so gae to ghar mein mire ratjaga raha

kal un labon pe yun mira zikr-e-wafa raha

wijdan jhumta raha wo bolta raha

barson yahi mizaj-e-siyasat bana raha

mujrim ki tarah shahr mein har be khata raha

ghar se nikal ke band gali mein pahunch gae

manzil mili na ghar ka koi rasta raha

main chup na rah saka lab-e-taswir ki tarah

main aina tha aina sach bolta raha

ayyari-e-khirad ka fusun kam kar gaya

ahl-e-junun ki aql pe parda para raha

allah re be shuuri-e-danish ke umr bhar

wo mere sath tha main use dhundhta raha

koshish ke bawajud chhupae na chhup saka

har qahqahe ke lahja mein gham bolta raha

main zabt-e-sang-e-mel samajhta raha jise

wo shakhs meri rah ka patthar bana raha