میں شاخ شاخ پہ مہکا کرن کرن میں رہا

میں شاخ شاخ پہ مہکا کرن کرن میں رہا

کہ روح بن کے رہا میں جس انجمن میں رہا

اسیر کشمکش دور پر محن میں رہا

وہ آفتاب ہوں جو مدتوں گہن میں رہا

خلوص عشق کی محرومیاں معاذ اللہ

میں عمر بھر تہی دامن بھرے چمن میں رہا

نگاہ محو تماشا لبوں پہ مہر سکوت

میں آئنے کی طرح تیری انجمن میں رہا

کسی سے عہد محبت پہ جب بھی غور کیا

اک ارتعاش سا پہروں مرے بدن میں رہا

ترے بغیر کہیں بھی تو جی بہل نہ سکا

میں چین سے کبھی گھر میں رہا نہ بن میں رہا

مہیب اتنا کہ وہ جلوہ برق طور بنا

لطیف اتنا کہ پھولوں کے پیرہن میں رہا

زباں سلیس بیاں دل نواز فکر جمیل

یہ اہتمام ہمیشہ مرے سخن میں رہا

وہ دوستوں کے عزائم سے ضبطؔ کیا بچتا

جو دشمنوں کی طرف سے بھی حسن ظن میں رہا

main shakh shakh pe mahka kiran kiran mein raha

ke ruh ban ke raha main jis anjuman mein raha

asir-e-kashmakash-e-dur par mehan mein raha

wo aftab hun jo muddaton gahan mein raha

khulus-e-ishq ki mahrumiyan maaz allah

main umr bhar tahi daman bhare chaman mein raha

nigah mahw-e-tamasha labon pe mehr-e-sukut

main aine ki tarah teri anjuman mein raha

kisi se ahd-e-mohabbat pe jab bhi ghaur kiya

ik irtiash sa pahron mire badan mein raha

tire baghair kahin bhi to ji bahal na saka

main chain se kabhi ghar mein raha na ban mein raha

muhib itna ke wo jalwa barq-e-tur bana

latif itna ke phulon ke pairahan mein raha

zaban silis bayan dil nawaz fikr-e-jamil

ye ehtimam hamesha mire sukhan mein raha

wo doston ke azaim se zabt kya bachta

jo dushmanon ki taraf se bhi husn-e-zan mein raha