رہا روشن ہمیشہ مطلع فکر و نظر اپنا

رہا روشن ہمیشہ مطلع فکر و نظر اپنا

ہتھیلی کا چراغ اور دار کا سورج ہے سر اپنا

کریں وہ سنگ باری شوق سے حاضر ہے سر اپنا

مگر جی بھر کے پہلے دیکھ لیں شیشے کا گھر اپنا

مرا احساس محرومی نہیں اظہار مایوسی

ابھی کیا ہے ابھی تو دوش پر باقی ہے سر اپنا

چھپاؤں اس چمن میں کس طرح کانٹوں بھرا دامن

کہ میں نے دے کے سینچا تھا جسے خون جگر اپنا

میں وہ آئینۂ جور و جفائے ناز ہوں جس کو

اگر دیکھے تو خود سر پیٹ لے آئینہ گر اپنا

میں کس منہ سے کروں اب گردش ایام کا شکوہ

تلاش اس کو کسی کی تھی بتا بیٹھا میں گھر اپنا

نقاب رخ الٹ کر بام پر اب تم بھی آ جاؤ

میں پھیلائے ہوئے ہوں دامن ذوق نظر اپنا

کوئی کیسے بدل سکتا ہے فطرت کے تقاضوں کو

کہ ہجرت کے حوالے سے جو یاد آتا ہے گھر اپنا

جو بیماری کی سن کر ضبطؔ آتے ہیں عیادت کو

بھرا رہتا ہے اکثر ایسے مہمانوں سے گھر اپنا

raha raushan hamesha matla-e-fikr-o-nazar apna

hatheli ka charagh aur dar ka suraj hai sar apna

karen wo sang bari shauq se hazir hai sar apna

magar ji bhar ke pahle dekh len shishe ka ghar apna

mira ehsas-e-mahrumi nahin izhar-e-mayusi

abhi kya hai abhi to dosh par baqi hai sar apna

chhupaun is chaman mein kis tarah kanton bhara daman

ke main ne de ke sincha tha jise khun-e-jigar apna

main wo aina-e-jaur-o-jafa-e-naz hun jis ko

agar dekhe to khud sar pet le aina gar apna

main kis munh se karun ab gardish-e-ayyam ka shikwa

talash us ko kisi ki thi bata baitha main ghar apna

naqab-e-rukh ulat kar bam par ab tum bhi a jao

main phailae hue hun daman-e-zauq-e-nazar apna

koi kaise badal sakta hai fitrat ke taqazon ko

ke hijrat ke hawale se jo yad ata hai ghar apna

jo bimari ki sun kar zabt ate hain ayadat ko

bhara rahta hai aksar aise mehmanon se ghar apna