گھر سے نکالے پاؤں تو رستے سمٹ گئے

گھر سے نکالے پاؤں تو رستے سمٹ گئے

ہم یوں چلے کہ راہ کے پتھر بھی ہٹ گئے

ہم نے کھلے کواڑ پہ دستک سنی مگر

وہ کون لوگ تھے کہ جو آ کر پلٹ گئے

در بند ہی رکھو کہ ہواؤں کا زور ہے

اب کے کھلے کواڑ تو سمجھو کہ پٹ گئے

غارت گریٔ زور تلاطم ارے غضب

کشتی کے بادبان ہواؤں سے پھٹ گئے

صحرا کی تیز دھوپ گھنے جنگلوں کی چھاؤں

ان میں مرے نصیب کے دن رات بٹ گئے

شہرت کی آرزو نے کیا بے وطن ہمیں

اتنی بڑھی غرض کہ اصولوں سے ہٹ گئے

جب جب بھی میں نے ترک وطن کا کیا خیال

قدموں سے میرے گاؤں کے رستے لپٹ گئے

کن سے کریں شکایت جور و ستم ظفرؔ

اپنے گلے تو اپنے ہی خنجر سے کٹ گئے

ghar se nikale paon to raste simat gae

ham yun chale ke rah ke patthar bhi hat gae

ham ne khule kiwar pe dastak suni magar

wo kaun log the ke jo a kar palat gae

dar band hi rakho ke hawaon ka zor hai

ab ke khule kiwar to samjho ke pat gae

gharat giri-e-zor talatum are ghazab

kashti ke badban hawaon se phat gae

sahra ki tez dhup ghane jangalon ki chhaon

un mein mire nasib ke din rat bat gae

shohrat ki arzu ne kiya be watan hamen

itni barhi gharaz ke usulon se hat gae

jab jab bhi main ne tark-e-watan ka kiya khayal

qadmon se mere gaon ke raste lipat gae

kin se karen shikayat-e-jaur-o-sitam zafar

apne gale to apne hi khanjar se kat gae