امید صبح بہاراں خزاں سے کھینچتے ہیں

امید صبح بہاراں خزاں سے کھینچتے ہیں

یہ تیر روز دل ناتواں سے کھینچتے ہیں

کشید تشنہ لبی قطرہ قطرہ پیتے ہیں

یہ آب تلخ غم رفتگاں سے کھینچتے ہیں

میں ان سے لقمۂ طیب کی داد کیا چاہوں

جو اپنا رزق دہان سگاں سے کھینچتے ہیں

سبو سے لذت یک گونہ لیتے ہیں لیکن

خمار خاص لب دوستاں سے کھینچتے ہیں

دکھائی پڑتا ہے اعدا میں ایک چہرۂ دوست

سو ہاتھ صاحبو سیف و سناں سے کھینچتے ہیں

خیال تازہ سے کرتے ہیں خواب نو تخلیق

ظفرؔ زمینیں نئی آسماں سے کھینچتے ہیں

ummid-e-subh baharan khizan se khinchte hain

ye tir roz-e-dil natawan se khinchte hain

kashid tishna labi qatra qatra pite hain

ye ab talkh gham-e-raftagan se khinchte hain

main un se luqma-e-tayyab ki dad kya chahun

jo apna rizq dahan-e-sagan se khinchte hain

subu se lazzat-e-yak guna lete hain lekin

khumar-e-khas lab-e-dostan se khinchte hain

dikhai parta hai aada mein ek chehra-e-dost

so hath sahabo saif-o-sinan se khinchte hain

khayal taza se karte hain khwab-e-nau takhliq

zafar zaminen nai asman se khinchte hain