جان بے تاب عجب تیرے ٹھکانے نکلے

جان بے تاب عجب تیرے ٹھکانے نکلے

بارش سنگ میں سب آئنہ خانے نکلے

سب بڑے زعم سے آئے تھے نئے صورت گر

سب کے دامن سے وہی خواب پرانے نکلے

رات ہر وعدہ و پیمان امر لگتا تھا

صبح کے ساتھ کئی عذر بہانے نکلے

اے کسی آتے ہوئے زندہ زمانے کے خیال

ہم ترے راستے میں پلکیں بچھانے نکلے

کاسۂ درد لیے کب سے کھڑے سوچتے ہیں

دست امکان سے کیا چیز نہ جانے نکلے

حرف انکار سر بزم کہا میں نے ظفرؔ

لاکھ اندیشے مرے دل کو ڈرانے نکلے

jan-e-be tab ajab tere thikane nikle

barish-e-sang mein sab aina khane nikle

sab bare zaam se ae the nae surat gar

sab ke daman se wahi khwab purane nikle

rat har waada-o-paiman-e-amar lagta tha

subh ke sath kai uzr bahane nikle

ai kisi ate hue zinda zamane ke khayal

ham tire raste mein palken bichhane nikle

kasa-e-dard liye kab se khare sochte hain

dast-e-imkan se kya chiz na jane nikle

harf-e-inkar sar-e-bazm kaha main ne zafar

lakh andeshe mire dil ko darane nikle