ہو چکی ہجرت تو پھر کیا فرض ہے گھر دیکھنا

ہو چکی ہجرت تو پھر کیا فرض ہے گھر دیکھنا

اپنی فطرت میں نہیں پیچھے پلٹ کر دیکھنا

اب وہ برگد ہے نہ وہ پنگھٹ نہ اب وہ گوپیاں

ایسے پس منظر میں کیا گاؤں کا منظر دیکھنا

جادۂ گل کی مسافت ہی نہیں ہے زندگی

زندگی کرنا ہے انگاروں پہ چل کر دیکھنا

اپنے مخلص دوستوں پر وار میں کیسے کروں

کوئی دشمن سامنے آئے تو جوہر دیکھنا

پیاس ہونٹوں پر لیے بیٹھا ہوں ساحل پر مگر

ضد پہ آ جاؤں تو کوزے میں سمندر دیکھنا

کھڑکیاں کھلتے ہی ہم ہوں گے نشانہ وقت کا

زخم سینے پر سجانا ہو تو باہر دیکھنا

میرے ہاتھوں کی لکیروں میں ہے گردش وقت کی

میری قسمت ہی میں لکھا تھا یہ چکر دیکھنا

زندگی بھر ٹھوکریں کھانے سے بہتر ہے ظفرؔ

راستہ چلتے ہوئے رستے کے پتھر دیکھنا

ho chuki hijrat to phir kya farz hai ghar dekhna

apni fitrat mein nahin pichhe palat kar dekhna

ab wo bargad hai na wo panghat na ab wo gopiyan

aise pas manzar mein kya gaon ka manzar dekhna

jada-e-gul ki masafat hi nahin hai zindagi

zindagi karna hai angaron pe chal kar dekhna

apne mukhlis doston par war mein kaise karun

koi dushman samne ae to jauhar dekhna

pyas honton par liye baitha hun sahil par magar

zid pe a jaun to kuze mein samundar dekhna

khirkiyan khulte hi ham honge nishana waqt ka

zakhm sine par sajana ho to bahar dekhna

mere hathon ki lakiron mein hai gardish waqt ki

meri qismat hi mein likha tha ye chakkar dekhna

zindagi bhar thokaren khane se behtar hai zafar

rasta chalte hue raste ke patthar dekhna