خواب پلکوں پہ مری آ کے مچل جاتے ہیں

خواب پلکوں پہ مری آ کے مچل جاتے ہیں

یا کبھی بن کے گہر آنکھ سے ڈھل جاتے ہیں

مجھ کو گوشہ کوئی مانوس سا جو لگتا ہے

لوگ دیوار پہ تصویر بدل جاتے ہیں

کل وہ عالم تھا کہ اک جان تھی دو قالب تھے

آج یہ ہے کہ وہ کترا کے نکل جاتے ہیں

ہم کو طوفان حوادث کا کوئی خوف نہیں

یہ جو آتے ہیں تو کچھ ہم بھی بہل جاتے ہیں

اپنے آنگن میں وہ سورج کے تمنائی ہیں

جو دیا دیکھ کے ہمسائے کا جل جاتے ہیں

میں سخنور بھی نہیں فن کا سلیقہ بھی نہیں

زخم ہیں دل کے جو نغمات میں ڈھل جاتے ہیں

khwab palkon pe miri a ke machal jate hain

ya kabhi ban ke guhar ankh se dhal jate hain

mujh ko gosha koi manus sa jo lagta hai

log diwar pe taswir badal jate hain

kal wo alam tha ke ik jan thi do qalib the

aj ye hai ke wo katra ke nikal jate hain

ham ko tufan-e-hawadis ka koi khauf nahin

ye jo ate hain to kuchh ham bhi bahal jate hain

apne angan mein wo suraj ke tamannai hain

jo diya dekh ke hamsae ka jal jate hain

main sukhanwar bhi nahin fan ka saliqa bhi nahin

zakhm hain dil ke jo naghmat mein dhal jate hain