کیسے ہر درد کو سینے میں چھپائے رکھیں

کیسے ہر درد کو سینے میں چھپائے رکھیں

اور ہونٹوں پہ تبسم کو سجائے رکھیں

جو تھے اپنے وہ زمانہ ہوا سب چھوڑ گئے

کب تلک بزم کو غیروں سے سجائے رکھیں

یہ سنا ہے کہ وہاں دیر ہے اندھیر نہیں

تو چلو بہر دعا ہاتھ اٹھائے رکھیں

جب یہ چھٹ جائیں گے بادل تو کرن پھوٹے گی

شمع امید کی اک ہم بھی جلائے رکھیں

یوں تو بھولے سے بھی اب یاں نہ کوئی آئے گا

احتیاطاً ہی مگر گھر کو سجائے رکھیں

دل میں سوئی ہوئی چنگاری نے کروٹ لی ہے

اب تو اس آگ سے دامن کو بچائے رکھیں

ہوگا نکہتؔ سے معطر یہ چمن بھی اک روز

بس تری یاد کے پودوں کو لگائے رکھیں

kaise har dard ko sine mein chhupae rakhen

aur honton pe tabassum ko sajae rakhen

jo the apne wo zamana hua sab chhor gae

kab talak bazm ko ghairon se sajae rakhen

ye suna hai ke wahan der hai andher nahin

tu chalo bahr-e-dua hath uthae rakhen

jab ye chhut jaenge badal to kiran phutegi

shama ummid ki ik ham bhi jalae rakhen

yun to bhule se bhi ab yan na koi aega

ehtiyatan hi magar ghar ko sajae rakhen

dil mein soi hui chingari ne karwat li hai

ab to is ag se daman ko bachae rakhen

hoga nikhat se muattar ye chaman bhi ik roz

bas tiri yad ke paudon ko lagae rakhen