بے حال دل کا حال کروں تو غزل کہوں

بے حال دل کا حال کروں تو غزل کہوں

جینے کا پھر ملال کروں تو غزل کہوں

دل تو مثال سنگ ہے ٹوٹے گا کیا بھلا

خستہ جگر کا حال کروں تو غزل کہوں

یہ رنگ چار روزہ ہے رعنائی چار روز

جو حسن لا زوال کروں تو غزل کہوں

ہے لطف اس میانہ روی میں بھلا کہاں

کچھ امر با کمال کروں تو غزل کہوں

موسم نہ سرد گرم نہ طوفاں کا زور ہے

اب خود ہی کچھ وبال کروں تو غزل کہوں

مدت ہوئی حبیب سے شکوہ کئے ہوئے

اب اس سے کچھ سوال کروں تو غزل کہوں

ہیں اس جہاں میں اچھے سخنور ہزارہا

نکہتؔ کو بے مثال کروں تو غزل کہوں

be hal dil ka hal karun to ghazal kahun

jine ka phir malal karun to ghazal kahun

dil to misal-e-sang hai tutega kya bhala

khasta jigar ka hal karun to ghazal kahun

ye rang char roza hai raanai char roz

jo husn la zawal karun to ghazal kahun

hai lutf is miyana rawi mein bhala kahan

kuchh amar ba kamal karun to ghazal kahun

mausam na sard garm na tufan ka zor hai

ab khud hi kuchh wabal karun to ghazal kahun

muddat hui habib se shikwa kiye hue

ab us se kuchh sawal karun to ghazal kahun

hain is jahan mein achchhe sukhanwar hazarha

nikhat ko be misal karun to ghazal kahun