سخن کو بے حسی کی قید سے باہر نکالوں

سخن کو بے حسی کی قید سے باہر نکالوں

تمہاری دید کا کوئی نیا منظر نکالوں

یہ بے مصرف سی شے ہر گام آڑے آنے والی

انا کی کینچلی کو جسم سے باہر نکالوں

طلسمی معرکے کہتے ہیں اب سر ہو چکے ہیں

ذرا زنبیل کے کونے سے میں بھی سر نکالوں

لہو مہکا تو سارا شہر پاگل ہو گیا ہے

میں کس صف سے اٹھوں کس کے لیے خنجر نکالوں

بس اب تو منجمد ذہنوں کی یاورؔ برف پگھلے

کہاں تک اپنی استعداد کے جوہر نکالوں

sukhan ko be hissi ki qaid se bahar nikalun

tumhari did ka koi naya manzar nikalun

ye be masraf si shai har gam are ane wali

ana ki kenchli ko jism se bahar nikalun

tilismi marke kahte hain ab sar ho chuke hain

zara zambil ke kone se main bhi sar nikalun

lahu mahka to sara shahr pagal ho gaya hai

main kis saf se uthun kis ke liye khanjar nikalun

bas ab to munjamid zehnon ki yawar barf pighle

kahan tak apni istedad ke jauhar nikalun