یہ نظارہ نہ دیکھا تھا فراز بام سے پہلے

یہ نظارہ نہ دیکھا تھا فراز بام سے پہلے

نکلتا ہے کوئی سورج غروب شام سے پہلے

اسی کے نام کر ڈالے ہیں میں نے رت جگے اپنے

کسی کا نام لیتا ہے جو میرے نام سے پہلے

تمہارے آتشیں لہجے سے ہم خائف نہیں لیکن

ہماری بات تو سن لو ذرا آرام سے پہلے

سکوت شہر خاموشاں بھی جس پر رشک فرمائے

کچھ ایسی کیفیت ہوتی ہے ہر کہرام سے پہلے

رہین آب و دانہ ہی سہی آوارگی اپنی

گھروں کو لوٹ آتے ہیں پرندے شام سے پہلے

بہ ہر صورت انہیں رنج اسیری تو اٹھانا ہے

نظر دانے پہ ہے پرواز جن کی دام سے پہلے

ye nazzara na dekha tha faraz-e-bam se pahle

nikalta hai koi suraj ghurub-e-sham se pahle

usi ke nam kar dale hain main ne rut jage apne

kisi ka nam leta hai jo mere nam se pahle

tumhare atishin lahje se ham khaif nahin lekin

hamari bat to sun lo zara aram se pahle

sukut-e-shahr-e-khamoshan bhi jis par rashk farmae

kuchh aisi kaifiyat hoti hai har kohram se pahle

rahin-e-ab-o-dana hi sahi awargi apni

gharon ko laut ate hain parinde sham se pahle

ba har surat unhen ranj-e-asiri to uthana hai

nazar dane pe hai parwaz jin ki dam se pahle