تم ٹہنیوں کی پھلجھڑیوں سے جشن شاہ بلوط منانا

تم ٹہنیوں کی پھلجھڑیوں سے جشن شاہ بلوط منانا

شہزادے کے شگوفے کو اک شاخچۂ مضبوط بتانا

سینوں کے احراموں والے زندہ عجوبے دھڑ دھڑ دھڑکیں

نیم دلوں کے نیل کنارے تب سامان حنوط بہانا

کچھ درباری گھوڑوں پر بھگدڑ سے بڑی مصیبت یہ ہے

گلی گلی کے خرگوشوں کو حال بہت مربوط سنانا

رنگ برنگی تسخیروں کے بستر کا رومان سنبھالو

پائنتی خواہ جداگانہ ہو رکھو مگر مخلوط سرہانا

محراب و مینار و گنبد یاد کی اک تجسیم تو ہوں گے

جب تعمیر محبت کرنا ہر گوشہ مخروط بنانا

رسم و راہ بڑھی تو حسن کے ہر پہلو سے علاقہ رہے گا

خطۂ خاکی سے روزانہ غیر ضروری خطوط مٹانا

میری گمٹی پر سے ابھرے اور اس کی برجی میں ڈوبے

دل کے ستارے تیرے طلوع سے مجھ کو تیرا سقوط سہانا

tum tahniyon ki phuljhariyon se jashn-e-shah balut manana

shahzade ke shagufe ko ik shakhcha-e-mazbut batana

sinon ke ehramon wale zinda ajube dhar dhar dharken

nim dilon ke nil kinare tab saman hanut bahana

kuchh darbari ghoron par bhagdar se bari musibat ye hai

gali gali ke khargoshon ko hal bahut marbut sunana

rang barangi taskhiron ke bistar ka ruman sambhalo

painti khwah judagana ho rakho magar makhlut sarhana

mehrab-o-minar-o-gumbad yad ki ik tajsim to honge

jab taamir mohabbat karna har gosha makhrut banana

rasm-o-rah barhi to husn ke har pahlu se ilaqa rahega

khitta-e-khaki se rozana ghair zaruri khutut mitana

meri gumti par se ubhre aur us ki barji mein dube

dil ke sitare tere tulu se mujh ko tera suqut suhana