مستقبل کی آنکھ پہن کے درست اندازہ روئے تھے

مستقبل کی آنکھ پہن کے درست اندازہ روئے تھے

باسی شہر پہ رونے والے بالکل تازہ روئے تھے

یادوں کی زنبیل کھلی تو چوکھٹ حسرت‌ ناک ہوئی

کچھ لمحے دیوار سے لپٹے کچھ دروازہ روئے تھے

برس رہی تھی باغ عدن سے چھم چھم غم کی ہریالی

پیڑ فلک کے دروازے پر یک آوازہ روئے تھے

کاجل کاجل بہتے گئے تھے سرخ سویر کے ڈورے میں

آنکھ میں کچھ خوابوں کے چہرے غازہ غازہ روئے تھے

پیلے پات اتر آئے تھے سبز کتاب کے ماتم میں

کچھ بکھرے اوراق پہ تڑپے کچھ شیرازہ روئے تھے

نسلوں کے سیلاب کے آگے کوئی منڈیر نہ ٹھہری تھی

بستی کے منہ زور ٹھکانے بے دروازہ روئے تھے

کس کی شہ پر فصل ہنسی تھی کون نصیبے والا تھا

ہم تو کورے صحراؤں پر بے خمیازہ روئے تھے

mustaqbil ki ankh pahan ke durust andaza roe the

basi shahr pe rone wale bilkul taza roe the

yadon ki zambil khuli to chaukhat hasrat nak hui

kuchh lamhe diwar se lipte kuchh darwaza roe the

baras rahi thi bagh-e-adan se chham chham gham ki hariyali

per falak ke darwaze par yak awaza roe the

kajal kajal bahte gae the surkh sawer ke dore mein

ankh mein kuchh khwabon ke chehre ghaza ghaza roe the

pile pat utar ae the sabz kitab ke matam mein

kuchh bikhre auraq pe tarpe kuchh shiraza roe the

naslon ke sailab ke age koi munder na thahri thi

basti ke munh zor thikane be darwaza roe the

kis ki shah par fasl hansi thi kaun nasibe wala tha

ham to kore sahraon par be khamyaza roe the