شام کی شاخ شکستہ برقرار نغمہ ہے

شام کی شاخ شکستہ برقرار نغمہ ہے

رنگ سینچا یا کسی نے سر بکھیرا چار سو

پردۂ پرداز پر نقش و نگار نغمہ ہے

آبشار خامشی ہے کوہساروں سے ادھر

خاکساروں کے یہاں جو انتظار نغمہ ہے

تھرتھراتی سرسراتی سنسناتی ساعتو

تھم رہو اس راستے پر شہسوار نغمہ ہے

رنگ سا یا راگ سا پہچانیو یہ باغ سا

ہو کے عالم میں یہی پروردگار نغمہ ہے

شش جہت کے اس چھتارے سے کشاکش ہی سہی

کہنے کو ان انگلیوں کو اختیار نغمہ ہے

بجھنے والے اب بجھیں گے لرزش مستانہ سے

یعنی ان افسردگاں کو اعتبار نغمہ ہے

sham ki shakh shikasta barqarar-e-naghma hai

rang sincha ya kisi ne sar bikhera char su

parda-e-pardaz par naqsh-o-nigar naghma hai

abshar-e-khamushi hai kohsaron se idhar

khaksaron ke yahan jo intizar-e-naghma hai

thartharati sirasrati sansanati saato

tham raho is raste par shahsawar naghma hai

rang sa ya rag sa pahchaniyo ye bagh sa

ho ke alam mein yahi parwardigar naghma hai

shash jihat ke is chhatare se kashakash hi sahi

kahne ko in ungliyon ko ikhtiyar naghma hai

bujhne wale ab bujhenge larzish mastana se

yaani un afsurdagan ko etibar-e-naghma hai