میں نے اک آواز سنی تھی کمرے میں خاموشی کی

میں نے اک آواز سنی تھی کمرے میں خاموشی کی

میرے کان میں آ کر تیری یادوں نے سرگوشی کی

کچھ تو گھر کا رستہ میں بھی اپنی دھن میں بھول گیا

اور نشیلی آنکھوں نے بھی طاری کچھ مدہوشی کی

ہم نے پھولوں سے مصرعوں کو خون دل سے یوں سینچا

ساری عمر ہی خوشبو بانٹی ہم نے عطر فروشی کی

اپنوں نے رازوں کی گٹھڑی بیچ چوراہے میں رکھ دی

لوگوں نے تو بات اچھالی رب نے پردہ پوشی کی

کتنے ہی ان دیکھے منظر مجھ سے باتیں کرتے ہیں

جب بھی غزلیں پڑھتا ہوں میں ساغرؔ محسنؔ دوشیؔ کی

ہم نے سوچا اور دھویں نے خد و خال بنا ڈالے

ہم نے تیرا ہجر منایا کھل کر سگریٹ نوشی کی

خوابوں کی دنیا سے آصفؔ اب تو باہر آ جاؤ

تپتا سورج سر پر ہے اور باتیں راکا پوشی کی

main ne ik awaz suni thi kamre mein khamoshi ki

mere kan mein a kar teri yadon ne sargoshi ki

kuchh to ghar ka rasta mein bhi apni dhun mein bhul gaya

aur nashili ankhon ne bhi tari kuchh madhoshi ki

ham ne phulon se misron ko khun-e-dil se yun sincha

sari umr hi khushbu banti ham ne itr faroshi ki

apnon ne razon ki gathri bich chaurahe mein rakh di

logon ne to bat uchhali rab ne parda poshi ki

kitne hi an dekhe manzar mujh se baten karte hain

jab bhi ghazlen parhta hun main saghar mohsin doshi ki

ham ne socha aur dhuen ne khad-o-khal bana dale

ham ne tera hijr manaya khul kar sigret noshi ki

khwabon ki duniya se asaf ab to bahar a jao

tapta suraj sar par hai aur baten raka poshi ki