تنہا کب ہوں میرے سنگ پرندے ہیں

تنہا کب ہوں میرے سنگ پرندے ہیں

سپنے بھی تو رنگا رنگ پرندے ہیں

مجھ کو بیٹھا دیکھ کے جملے کستے تھے

میرے اڑنے پر اب دنگ پرندے ہیں

پھر سے کعبہ اک دشمن کی زد پر ہے

پھر لشکر سے محو جنگ پرندے ہیں

تیرے ساتھ ہیں شہر کی پختہ دیواریں

میں سادھو ہوں میرے سنگ پرندے ہیں

تیرے لہجے کی تصویری شکلیں ہیں

جتنے بھی اڑتے خوش رنگ پرندے ہیں

پنجروں کی بہتات گواہی دیتی ہے

انسانوں کے ہاتھوں تنگ پرندے ہیں

سب کچھ ہے بس تیری ایک کمی سی ہے

بادل پانی دھوپ پتنگ پرندے ہیں

بے خود سی وہ ہر سو اڑتی پھرتی ہے

اس کے آصفؔ سارے انگ پرندے ہیں

tanha kab hun mere sang parinde hain

sapne bhi to ranga rang parinde hain

mujh ko baitha dekh ke jumle kaste the

mere urne par ab dang parinde hain

phir se kaaba ik dushman ki zad par hai

phir lashkar se mahw-e-jang parinde hain

tere sath hain shahr ki pukhta diwaren

main sadho hun mere sang parinde hain

tere lahje ki taswiri shaklen hain

jitne bhi urte khush rang parinde hain

pinjaron ki bahutat gawahi deti hai

insanon ke hathon tang parinde hain

sab kuchh hai bas teri ek kami si hai

badal pani dhup patang parinde hain

be khud si wo har su urti phirti hai

us ke asaf sare ang parinde hain